送生日禮物給生母

妹妹快要五歲了，這陣子在想她的mini生日會要預備些什麼。

莉：我生日你會送乜嘢俾我呀？（典型在consumerism 世界中長大的孩子）

媽：你生日點解一定要我送禮物俾你呀？你應該送禮物俾我呀！我咁辛苦生你出嚟！

莉：（笑）

比：（突然很著急）死喇！我生日嘅時候冇送禮物俾生母呀！！

媽：（差點失笑）唔緊要，你下年生日咪畫張咭俾生母囉！我地都未咁快有得見佢住。畫完幫你keep住先，遲D有機會俾佢囉！

兩姊妹的生物世界

一天早上在馬鐵月台等車，看見月台邊有一隻小螞蟻在慌亂地走著，我們在討論著牠究竟在找食物、找出路，還是在找同伴時，阿比發現了另一隻螞蟻！

阿比跟那隻螞蟻説：喂，你嘅朋友響呢道呀！

佢真的很天真可愛！

星期六早上，妹妹帶著她心愛的elephant毛公仔來我們的床。她說elephant用象鼻吸水，又用象鼻噴水，忽然，她說：

呀，佢可以做消防員喎！

掙扎

莉：媽咪，你以前有冇掙扎過架？

我心想，四歲人仔，做乜講嘢咁大人嘅⋯

媽：有，有掙扎過，不過你想問掙扎啲咩先？

莉：掙扎唔想冲涼囉！

媽：（失笑）有，梗係有喇！

阿比懷念生母的日子

每年母親節前一天都是生母節(Birthmother's Day) 。今年我跟阿比說是生母節的日子，她說她很掛念他們。早上，她為生父生母彈了一首歌 -- 神是愛。在她彈的時間，我在想，假若她生父母有機會聽福音，信耶穌就好了。遙遠地祝福他們⋯

http://youtu.be/dSQvKdqV5ZI

下午，到午睡時間，阿比一直不願睡覺。我問她為何不想睡，她説因為她很掛念生父母。我叫她畫一幅畫給他們，她很欣然接受這提議！我很開心看見畫中的人是有著笑臉的，至少她想起他們是開心的。我覺得很特別的是她用了她的原名去署名，看到她頗清楚她這identity！畫完兩幅，思念抒發了，阿比也滿足地睡去。書信繪畫的功效真大！這兩幅畫也成為阿比珍貴收藏之二！

艾莉餐室

A餐

士多啤梨 Donut + 朱古力

C餐

餐肉太陽蛋 + 小蛋糕甜品

唔知點解，冇B餐。

阿比的國民教育

昨晚跟阿比一起溫習常識科⋯

媽：我地嘅祖國係乜嘢國家？

比：香港

媽：祖國喎？係乜國呀？

比：香港

媽：中國嘅首都係北京，日本嘅首都係東京。

媽：中國嘅首都係？

比：東京

媽：中國係個文明古國，即係一個好耐好古老嘅國家，以前係好叻㗎！

比：「懶」叻呀？

我估提倡國民教育的人士見到阿比應該好想哭⋯

阿比上電視！

這幾個月，我們一家好慶幸可以有一個好特別的經歷，一段很難忘的集體回憶。我們有幸參與了港台鏗鏘集的拍攝工作，將領養家庭的真象呈現給觀眾。

在電視上接受訪問，也不是我們的第一次，在領養的第一年，也試過在無缐新聞中出現過一兩分鐘。不過這樣專題式的訪問，還是首次。加上這是一個備受觀眾歡迎的正氣節目，心情很興奮。

拍攝分了七次，新鮮好玩之餘，倒也很勞心勞力。在我心中一直擔心的是阿比的說話組織能力不高，怕她未有能力去表達她對被領養的感受。今次阿比的表現，令我對她的能力有所改觀。當中我們花了一些時間去錄下她讀故事書的句子，她雖然要錄很多take才ok，但我很欣賞她沒有放棄，一直努力的去諗那些句子。當然出來的效果是因為有很多錄音及footage所以可以拼湊得很完美，但看著阿比的努力嘗試，我很感動及安慰！原來她諗英文倒也流暢！

最欣喜的，是看著她在人前自然地去講述自己對生父母的掛念，以及很希望做我親生女兒的渴求。可能很多人會覺得很殘忍，讓她小小年紀便要承受這些痛。但是，畢竟她被領養的背景就是會有這些痛，也沒有機會逃避。我會視之為鍛鍊她面對逆境挫折的過程，教她接受人生可以有的不完美。

領養已經七年多了，很多事情及想法都變成理所當然，該當如此。就是藉這些機會可以從朋友及其他人的看後感中，看見自己和阿比已經每天每點消化了作為領養家庭及被領養者的意義，並可以很平靜地接受阿比的生父母在我們家的位置。這些概念，對普羅大眾、甚至是一些領養父母本身，都是震撼的訊息。我更慶幸，我家（特別是阿比）都可以很坦然的去面對，更可以與人分享，並以領養為榮。

感謝朋友們家人們的支持信任，不介意出席和上鏡（希望你們看見自己上了電視感到興奮吧！），也衷心感謝編導的用心編排，把這故事說得這麼好！我們衷心希望藉此節目，更多人明白領養家庭的心，讓人更正面看待領養，遇上照顧不了孩子的生父母放心得下可以為孩子選擇這條有希望的出路，而不是長期放孩子在院舍或寄養家庭，卻歸家無期。希望最終所有的小孩都有屬於自己的家。

「老」師

爸：明天爸爸一早要去返學聽講座。

莉：乜爸爸都要返學咩？

爸：冇錯,爸爸都要聽其他老師的分享學習㗎嘛！

莉：係咪要聽D再老D嘅老師講野？

爸：⋯老師唔一定要係老嘅⋯

情感當前，科學與邏輯都要行埋一邊

今早早餐時，妹妹在提起有個朋友仔要戴眼鏡，我說是因為她遺傳了她媽媽的遠視⋯

媽：（對阿比）你生母有戴眼鏡，你生父冇戴眼鏡，唔知你會似邊個呢？

比：（好認真的想）我諗我會似⋯⋯你！

笑咗！還差點被口中的腸粉哽親！

媽：（對艾莉）我有戴眼鏡，爸B冇戴眼鏡，唔知你又會似邊個呢？

莉：（肯定地）你！

唔好啩，我唔想你要戴眼鏡喎！你似爸B好啲⋯ 不過我知感情分多啲⋯不過佢又幾大條道理去解釋⋯

莉：因為我好似你架嘛，人人都話我個樣好似你架喇！

似第二樣好啲囉！

火車上的阿比

今早帶阿比上學時，上了一班以旺角東為終點站的火車。在車程時，車長不時向乘客廣播，告訴乘客若去紅磡的話要如何轉車等。聽了幾次廣播後⋯

比：（叫車長）專心揸車喇！

之後又有好些廣播⋯

比：點解冇國語嘅？（轉念一想）呀，可能佢唔識講⋯

直率的問號句

剛過去的週末節目多多，星期日在教會踢了一大輪足球，下午又跟阿比的同學踏單車及到遊樂場玩足足三小時，晚飯後才盡慶而回。

星期一早上，妹妹醒來，我問她：你手手腳腳有冇好攰呀？

妹妹剛醒來，沒有太多表情，冷冷的問：點解會攰呀？

簡直是一支箭射進我的心房！對小孩子來說，睡了一覺所有體力都回來了吧！媽媽可還覺得手腳痠軟呢！對我家小孩的精力真是甘拜下風！也為妹妹的直率會心微笑！

傳道的妹妹

耶穌受難日，堂細佬在說什麼死呀誰人死呀之類⋯

嬸：死左三天會點呀？

莉：復活？

嬸：係呀！

莉：（想了一想）唔係呀，唔係三天呀，係耶穌返嚟嘅時候（復活）呀，剩係主耶穌先至係三天之後復活㗎！

想不到這小妹妹的神學觀如此清晰！是只有主耶穌才三天復活，我們死後三天不會復活，要待主再來時我們才會復活！（多謝爸B的教導！）妹妹你將來會考慮做傳道人嗎？

歲月對比照一照

亂講嘢

昨晚，爸爸告訴我們，現在香蕉流傳一種傳染病，很可能沒有香蕉吃。

爸：唔單止人會病，動物植物都會病㗎！

媽：就好似禽流感咁囉！

比：咁啲雞傳染啲香蕉呀？

莉：你係咪又亂講嘢呀？

我只係可以講，阿比好天真，艾莉好老積，加埋一齊的火花令我們笑不停！

口齒伶莉 （二）

誰話事 --後記

我記得阿妹說過媽咪大啲所以媽咪話事，我也想知她會不會為永遠冇得話事而不開心⋯

媽：咁你成日都細過我地，咁一直都冇得話事囉？你會唔會唔開心㗎？

莉：咁我第時大個大人嘅時候咪有得話事囉！

妹妹真的很正面！不過當然有很沮喪的時候。妹妹一直不喜歡洗澡，每日都借詞推搪、拖延。有一晩，她很不喜歡我們堅持要她去洗澡⋯

莉：（哭著說）點解小朋友一定要跟大人講嘅嘢去做啫？

媽：咁我想問你，我地叫你去沖涼，係為我地好定係為你好吖？

莉：個答案好簡單，不過我唔想答你！

雖然口裏不肯承認，但心𥚃明白。氣消了後，又來對我説：媽咪可唔可以幫我冲涼呀？

家姐通常在早上或午覺後被叫醒時，都會發出很令人煩厭的叫聲。那天晚飯時，家姐又發出這種叫聲⋯

婆：成日都係呢啲聲！

莉：（自言自語）我扮唔到呢啲咁怪嘅聲㗎⋯

牙尖比•莉（四）

教家姐功課⋯

媽：一個星期有幾多日呀？

比：五日！

媽：你返學就係返五日⋯

早上與妹妹在討論她的同學仔⋯

莉：我其實大個想同XXX結婚㗎，因為我覺得佢大個應該好英俊嘅，可能佢染埋橙紅色頭髮就更英俊⋯ （超奇怪的審美觀）

媽：咁三少呢？三少英唔英俊呀？（三少即最近電視劇𥚃的馬俊偉）

莉：英俊⋯不過我大個嘅時候，佢就會好老㗎啦喎！

靚仔當前，阿妹都幾清醒！

妹妹學校家長日，不用上學，媽媽可以大半日陪她。今早出門口時，大家有點意見不合，妹妹自己rationalize件事⋯

妹：當剩係得我地兩個嘅時候，邊個最大吖？咪係你最大囉！咁你話事啦！

She really knows who is the boss!

父母是孩子最好的老師

有一次在尖沙咀街頭等買貢茶的期間，不經不覺跟艾莉上了一堂生物課。她指著旁邊內衣店櫥窗公仔露出肚臍而嘻嘻笑⋯

媽：你知唔知點解人有肚臍呀？

莉：唔知。

媽：肚臍原本是一條臍帶。BB在媽媽肚裏面唔識食嘢同呼吸，就靠臍帶連著媽媽，由媽媽身體俾D營養佢，一路長大長大。到BB生出來之後，佢就可以自己呼吸，又可以飲媽媽嘅奶，所以臍帶冇用喇，就會剪咗佢，之後就變咗個肚臍囉。你有冇肚臍㗎？

莉：有！

媽：咁你條臍帶連住邊個㗎？

莉：你囉！

媽：咁家姐呢？

莉：咪生母囉！

媽：咁我呢？邊個生我㗎？

莉：婆婆。

媽：爸B呢？

莉：嫲嫲。

媽：係呀，每個人都係響媽咪個肚道出來，所以個個都有肚臍㗎！

莉：咁恐龍有冇肚臍㗎？（剛在科學館門前看過大恐龍）

媽：恐龍又冇肚臍喎，恐龍唔係好似人咁成個BB咁生出來，係由蛋出來㗎。仲有邊D係由蛋道生出來㗎？

莉：雞？

媽：係呀，所以雞都冇肚臍㗎。咁你估貓貓有冇肚臍嘅呢？

莉：唔知呀！

媽：佢都係成個貓貓BB咁生出來㗎，所以佢有肚臍㗎。咁你估狗狗有冇肚臍吖？

莉：有？

真好，一箋茶的時間可以用來跟女兒上一堂包含了生物課、常識課、推理、領養的知識！真比坊間的興趣班好多了！更可增進親子關係，實在是很高回報但低成本（一杯貢茶）的投資項目！

低處未算低

每晚與阿比做功課都是耐力持久戰，考媽媽的EQ。昨晚的情況，到現在為止，是新經典。

阿比平日放學回家，我都會叫她睡個午覺，好讓她有足夠精神在我放工回家後開始做功課。晚飯後，她用了首半小時來刨鉛筆，下一個小時做完第一份功課，一直做（內加洗澡時間），到十一時半終於做剩一份抄寫corrections的功課。每天其實打兩份工的我當然累死了，交帶她做好就睡，我也迅速睡著（老公也隨後斷電）。

半夜二時，醒來發現兩個女兒竟然還未睡！！簡直非常震驚！家姐還在做那一份抄寫的功課，妹妹在旁寫習字簿！我當下有近乎暈倒的感覺！那份抄寫的功課，我本來預計她用15-20分鐘理應可以完成，想不到兩小時後仍未完成！！看見妹妹就更光火，好好的為何那麼夜也不肯睡？

用了5分鐘，在我的督促下，阿比完成了功課，也趕了她們上床。在床上的艾莉，因為覺得被我鬧，很委屈，哭了起來。我也花了一點時間去處理自己擔心女兒精神不夠的情緒。

轉念一想，我明白妹妹不肯睡的本意 -- 她想陪伴家姐，不想家姐獨自一個開夜車。這份心意其實很令人感動，我亦把妹妹擁入懷中，問問她的心意。結果不出我所料，妹妹亦感受到我是明白她而不是責怪她。況且她也很勤奮呢！半夜二時仍在練習寫字！

安頓好她們後，我回到自己的床上，心情激動得未能入眠。我有點後悔，為何我當初不多撐十多二十分鐘，確保阿比快點做完功課，讓大家安安樂樂一起睡，而不會有兩位小朋友半夜三更仍未睡的局面出現呢？但另一方面想，我卻覺得自己撐到十一時半也倒仁至義盡，我也不用太把這責任扛上身。

今天，出現了一大兩小的熊貓。幸好我剛巧請了假。處理完忙碌的大半天，三隻熊貓可以在下午補補眠。直到現在，兩隻小熊貓仍在冬眠呢！我不希望以後有比這更經典的事情出現⋯

兩個恨嫁的姊妹

家姐

有一天，阿比告訴我⋯

比：XX（一個很要好的男同學）話想同我結婚喎！我決定左喇！

媽：咁又唔駛咁快決定嘅，媽咪都係廿六歲先結婚，你仲有成廿年喎！

比：咁，可唔可以20歳結婚㗎？

幾日後，學校常識科到宜家傢俬外出學習。阿比與XX手拖手行傢俬舖，還在商量家品的需要⋯時光fast forward了廿年！

滴汗中⋯看來我們在女兒的性教育上要加把勁！

妹妹

小一生如是，竟然連K2生也在談婚論嫁！！

莉：YY （男同學）今日食茶點時，同我講話想第日大個同我結婚喎！

媽：咁你點答佢呀？

莉：我話，睇下點先，睇下點先喇！

媽：邊個教你咁樣講㗎？

莉：爸爸囉！

我絕對有理由相信，爸爸在女兒學習兩性關係的處理上，起到很重大的作用及影響！！

雖然話睇定啲先，兩姊妹在飯桌上在追問⋯

莉：咁究竟幾多歲先可以結婚呢？

媽：（究竟怎樣説才最合宜呢？）其實18歲就可以結婚，不過18歲通常都未讀完書，又未做嘢賺錢，未ready就好難結婚囉！

妹妹我倒不擔心，我較關心的是阿比。我其實知道家姐一直都很渴求身邊的人的認同與愛。這一定跟小時被生父母放棄有關係。我知道這樣的渴求令她更易更早進入拍拖的關係，作為母親，女兒越來越大，我只能把她交託神，祈求神教她在兩性關係上，有清晰的界線，選擇做對的事情。

口齒伶莉

一家人出門口，爸爸例牌很多嘢搞，未出到門。阿比見電梯快到了，心急起來⋯

比：爸B，快D、快D、快D⋯

莉：（一臉從容冷靜）你唔嘈佢佢就快D㗎喇！

最近嫲嫲給妹妹買了一個小足球，妹妹使盡勁的在家中練習，過了一段長時間，我看見妹妹蹲下、捉住自己的腳面説：

係咪好痛呀？你要努力忍住呀！（擬人法的演繹）

一晚，妹妹拿出一塊地墊放在客廳地上⋯

媽：你又野餐呀？（她之前也試過在客廳野餐）

妹：係呀！

媽：咁夜先嚟野餐？日頭先野餐㗎噃！

妹：我住喺美國㗎！

媽：（失笑中）哦，住喺美國所以係日頭呀？（轉數快得佢！好彩我都唔弱，跟到佢思維模式）