Sunday, September 30, 2012

M&M 姊妹傻氣笑語集(六)

妹妹返學後,學了「神造了我」這歌,最近我又聽到另外一首「神說有光,就有光照!照耀全地...」
媽:果首「神造了光」新學㗎?
莉:係神「說」有光呀!
我因為她這句猛然醒悟,神並非造了光,而是「說」要光,就有了光!我心想,她的神學觀念又幾正確!縱然我當然明白她只是想糾正我那歌名不是「神造了光」而是「神說有光」,不過已經起了警醒的作用!謝謝妹妹老師!

最近兩姊妹都由跳 jazz 改去學 ballet。
媽:妹妹呀,你鍾意跳 jazz 定跳 ballet 多啲呀?
莉:ballet 多啲!
媽:點解嘅?
莉:因為 Ms Yau (即Jazz老師)英文啱少少,Ms Shelley(ballet 老師)英文啱好多!
嘩巴閉到品評邊個英文好啲喎!真係笑死人!佢鄉下真係溫哥華!我當然明白她的意思是 Ms Yau 上堂時只說少少英文,Ms Shelley 因為是西人的緣故所以全程說英文!不過我發覺她很喜歡英文是事實!

昨天在電梯,管理員按了三樓平台。他出電梯後...
比:點解佢出三樓嘅?
媽:因為管理員要去巡下,睇下三樓有冇壞人囉!
比:咁如果有壞人點算呀?
媽:咁就報警囉!
比:乜壞人都鍾意玩滑梯㗎咩?
超可愛!我很愛家姐的童真!

Tuesday, September 25, 2012

伶牙俐齒的妹妹

一晚,我們一家坐了叔叔的便車...
莉:嘩,架車坐咗咁多人嘅?咁會好重㗎喎!
我與爸B在咋舌,原來阿妹可以把人多與重量拉上關係,很期待看著她將來智慧的增長!

有一次妹妹在沖涼房,我已忘了是在讚她做了些什麼時,她竟然說...
莉:我諗好多嘢㗎!我有腦㗎嘛!

爸:哈,你有冇高到呢?
莉:我會好快「成長」㗎喇!

一晚祈禱時,家姐例牌為屋企唔要曱甴祈禱,佢仲加咗句:請你唔好再造(曱甴)啦!我忍唔住笑了出聲來。祈完禱,妹妹跟家姐說...
莉:你祈得好好,不過媽咪笑啫!
我與爸B相視而笑...
爸:俾佢捉到(笑位)添!
莉:「祝」你生日快樂,祝你生日快樂~~~(如是者唱了生日歌三次,分別用廣東話、英文、普通話唱)
雖然很無厘頭,但我很喜歡妹妹這 word play!

Monday, September 24, 2012

媽媽眼中溫柔敏感的阿比

一天在等巴士時...
比:點解281A個A字咁細嘅?
望下,又係喎,所有乜X乜P都係比數字細的。

自從我們家有曱甴出沒,阿比差不多每晩都好faithful咁為到我哋屋企唔要有曱甴祈禱,經過一連串曱甴屋攻勢後,情況已經受控。但有兩次爸爸在隔壁門外看見曱甴,阿比自此之後,祈禱時連隔壁的屋也祈埋,真是愛鄰舍如同愛自己!

一晚,與阿比說起一個她認識的小玩伴...
比:XX嘅爸爸喺邊呀?
媽:佢爸爸同媽媽嗌咗交,唔再一齊住啦!
看見阿比好像很明白,也很替小朋友痛心的樣子,想起了她對生父母的思念。忽然覺得,XX不能見生父,其實與阿比不能見生父母的痛相似。我想阿比知道,she is not alone! 我給她指出這點後,她很體諒的說...
比:不過我地唔好在XX面前講,因為佢會唔開心架嘛,我冇得見生父生母都唔開心喇!
看見女兒如此懂得為人設想,很感動!也很感恩神給了她一顆溫柔而敏感的心。


Wednesday, September 19, 2012

上學後的妹妹繼續可愛

上學後,妹妹的說話能力好像更加好了,有幾次都令我們咋舌了...

吃飯時說起之前妹妹做過心臟超聲波,妹妹很記得當時的情景...
莉:我好感動呀!
大家都摸不著頭腦,為何她照超聲波會好感動。我反問她求證,原來應該她是好緊張才對。雖然她用錯了詞語,我們卻為她懂得用「感動」一詞很興奮!

另一天放學回來,妹妹說起其中一個小朋友掛念媽媽而哭...
莉:我去「安慰」佢呀。(原來佢識得用安慰這詞,我以為三歲的孩子只會說「我叫佢唔好喊」)
媽:咁你點樣安慰佢呀?
莉:我拖住佢隻手囉!
媽:咁你拖住佢隻手之後,佢有冇再喊?
莉:冇喇!
真係 sweet!好美麗!

昨晚吃飯前,妹妹要求要去洗手。
媽:咁早洗手做乜嘢呀?D餸都未煮好攞出來!
妹:我想洗手,坐喺櫈,「等候」D餸丫嘛!
梗係喺學校習慣要等候啦...

有一晚臨睡前妹妹摸著我的臉說,
妹:媽咪你好白!好似心言(同學仔)咁白。
媽:咁你白唔白?
妹:我都白!
媽:咁白靚唔靚架?
妹:靚!
媽:咁文翠老師靚唔靚呀?
妹:靚!
媽:係咪因為佢靚所以你鍾意佢呀?
妹:係呀!
從這個對話我開始明白妹妹很鍾意靚人,想親近她們,也解釋到為何她如此喜歡鍾嘉欣... 我慶幸我是她的媽媽,因為在孩子的眼中,媽媽永遠都是美麗的!

一晚,妹妹把我放在她書包以防她在校太掛念我們的家庭照拿出來給我,說:我唔需要啦,我唔會喊架啦!
呢個女講嘢真係老積到呢... 不過佢翌日終於在學校喊,因為排隊時跌親個鼻,流左幾滴鼻血。

一大早,我把奶放在妹妹面前...
妹:係瘦奶(skim) 定肥奶(homo)呀?
媽:少少肥,加啲瘦。點解唔想飲肥奶呀?
妹:因為我唔想肥,我想好似家姐咁瘦啲囉!
媽:你覺得自己好肥咩,你唔係肥呀!
妹:(微笑但很尖銳)你肥啲...
=_='
妹:(補飛) 你飲多啲瘦奶就會好似家姐咁瘦架啦!
... 阿妹,你大個就會知好多嘢唔一定可以天從人願架啦!

Sunday, September 09, 2012

兩姊妹開學後的趣事

艾莉

妹妹上學已經一星期,佢好叻叻,每天上學都笑咪咪的,沒有哭!我記得兩歲的她面對陌生人是很怕羞,成日躲在我的背後;三歲前她開始可以獨自上舞蹈班和主日學,三歲後上學也沒有再哭。很感恩看見女兒的成長。問妹妹為何不用哭,她說我知道爸爸媽媽婆婆公公一定會來接我㗎嘛!我的洗腦教育成功!

上學第三天,我接她放學時,在小巴上兩母女在閒聊...

媽:你最鍾意邊個老師呀?
莉:我鍾意文翠老師,因為佢幫紮返條辮。
媽:係呀?咁佢好惜你喎。
莉:係呀文翠老師好惜我,所以我冇喊。

有一晚,妹妹沖涼時不肯聽我指示仍執意要繼續玩水,我跟她說我不再理會她,便走出浴室。幾分鐘之後,我竟然看見妹妹包著大毛巾拿著衣服走出來!摸摸她,身體與腳板都已被抹乾!見她自理能力如此好,很令人欣慰。

最近妹妹很喜歡用英文去祈禱。一晚,爸爸夜歸,外面下著雨,孩子們說要為爸B祈禱希望他不會被淋濕。妺妹又用她的疑似英語去祈禱,但突然我發覺她在說:
Dad... No rain... House...... Abby,Elly, daddy, mommy house... Amen!

有板有眼,雖然不是完整句子,卻是重點全在呢!很欣賞她超強的語言能力!或許頭兩年較豐富的英語環境真的有果效?

阿比

有一個我們認識的小朋友暑假後上學不習慣而哭。
比:佢唔想返學,佢想去街呀?
        咁佢媽咪會好失望㗎喎!會嘥錢㗎嘛!(哈哈,我估你誤會咗係興趣班啦!)
不過我好欣賞佢會識得體諒別人的感受。感恩!

爸爸生日,阿比突然對爸爸的歲數很好奇...

比:爸B係咪 53 歲呀?
媽:梗係唔係啦!爸B 37咋,差咁遠呀大佬!
比:我唔係大佬喎,我係大...... 姐喎!
後來她再更正:我係大家姐喎...