Tuesday, March 29, 2016

弟弟的語言天份

一晚,在重看很多年前爸爸媽媽去泰國旅行的照片⋯
力:(指著我穿吊帶背心的樣子)著好少衫⋯
媽:(笑說)我仲以為佢話我冇著衫㖭!
力:(面不改容、一臉正經)無著⋯咁多衫⋯

睡前傾偈祈禱⋯
爸:Do you know English?
力:Yes!
爸:你應該講:"yes, I know!"
力:I yes!
爸:係 Yes, I know.
力:Yes... I... Yes...
媽:(發現其邏輯)佢係咪以為"I know" 係 "I no", yes/no 個 no 呀?

細路仔的邏輯真係不容忽視。

一日我們在看電視劇,看的是國語原音⋯
力:佢地講英文呀?
媽:唔係,佢地講國語呀。
力:國語即係普通話⋯

我很驚訝,我應該沒有刻意教過他這一點。我有理由相信,他很有語言天份。

Saturday, March 26, 2016

功夫熊貓3之觀後感

今天與三個小孩去戲院看「功夫熊貓3」,他們當然看得過癮興奮。今晚臨睡祈禱時,我特意問兩姊妹們對這戲有什麼感想:

比:我覺得好開心,因為阿寶可以見返佢生父,又可以返返來見返飛虎女呀、佢爸爸、美美呀⋯⋯
爸:其實你仲想唔想好似阿寶咁見返生父生母㗎?
比:唔想喇,我可以見到加力就得㗎喇!
爸:係咪因為你覺得你未必可以再見到佢地,所以你唔敢再咁想喇?
比:我有細佬就得㗎喇!
爸:係呀,有細佬對你真係好重要。不過我地鼓勵你,你其實可以求(見到生父生母的機會),或者有一日你可以見返佢地,見返你哥哥呢?
莉:我唔想家姐同細佬離開我地喎⋯⋯
媽:妹妹,你係咪覺得如果家姐佢地搵返生父生母,佢地就要離開呀?
莉:係呀⋯⋯
媽:傻妹,佢地就算搵到佢地生父生母都唔需要離開我地㗎!好似阿寶咁,佢可以同生父同平先生一齊格!
爸:你永遠都會係佢(阿比)個妹妹㗎!(莉甜笑)
媽:咁妹妹呢?你睇完套戲之後有乜嘢感受呀?
莉:我覺得好感動囉!我本來以為佢去左靈界就返唔到嚟,但係竟然返得到嚟!所以好感動。

其實幾個星期前,我們已經一起看過故事的小説版。看完,我也是這樣問她們的感想:

莉:我覺得阿寶好幸福囉!
媽:佢點樣幸福法呀?
莉:佢可以見返佢生父,又有佢爸爸好惜佢。兩個爸爸都惜佢,咪好幸福囉!
媽:阿比呢?
比:⋯⋯我都覺得好開心,因為佢可以同生父同爸爸一齊住⋯⋯

真好,又可以跟兩女兒再討論領養的話題!現在,她們又在免費電視上看「功夫熊貓2」⋯誰也不肯睡覺⋯

Wednesday, March 16, 2016

跟弟弟談領養

今早,跟加力在看(是重看又重看)Annie 這齣音樂劇時,忽然心血來潮,跟兩歲九個月的他聊起領養來⋯

力:佢爸爸媽媽死左呀?
媽:生佢嘅爸爸媽媽死左,不過呢個爸爸(那個百萬富翁)照顧佢囉,好似爸爸媽媽照顧你咁囉!
力:咁媽媽呢?
媽:佢媽媽咪呢個囉!不過生佢果個就唔響道。好似生你果個媽媽照顧唔到你,爸B媽咪照顧你咁囉。
媽:咁你掛唔掛住生你果個媽媽,你生母架?
力:(點頭)
媽:你知唔知生你個媽媽都係生家姐架?
力:都係生家家嘅⋯⋯
媽:家家係我生嘅,我係佢生母;你生母生你同家姐。不過我係你地三個嘅媽媽,一樣都咁惜!

經過九年的反覆練習,原來已經不會再緊張,反而有點興奮 -- 加力也開始長大了,可以跟他說領養的事。即使我有點懷疑他其實明白多少,但我深信這是一個很好的開始。

後記
忽然想起,原來之前也有藉著看照片跟弟弟緬懷過兒童院的日子⋯⋯
媽:你仲記唔記得你住過呢道架?
力:記得!
媽:咁果道係咪好多姨姨照顧你惜你架?
力:係姑娘呀⋯⋯(竟然識得糾正我!)
媽:係姑娘⋯細佬好多人惜架⋯

Tuesday, March 15, 2016

艾莉與學校

小一的第二個學期完結了,感覺上妹妹對小學適應多了,但仍未可説她完全融入。若旁人問她喜不喜歡學校,她會説喜歡;但在我們家人面前,答案仍然是不喜歡。

不喜歡的原因可以有很多:上課很悶、在校時間太長、部分老師沒有以前幼稚園的溫柔⋯其實她很懷念以前幼稚園的生活。她説現在最開心的是小息和午休時間,因為可以跟同學玩。

我曾經也很擔心,為何女兒比我想像中難及耐去適應?明明其資質尚可,為何她覺得英文教學是如此困難呢?看其成績,尤其英文科,也確實不算高。我明白她一直是對自己要求很高的人,自己覺得做不來時,她情願不去參與,以免失敗。所以眼見身邊同學個個的英文如此流利,她更覺得自己很不濟,很想退縮。

放學通常都是我接她的校車,我也例牌會問下她當日上學的情況。有三段經歷令我很難忘:

1. 運動會當日,她告訴我她是她班60米短跑首名出線的那一位,但決賽時卻跑第五。而第四名是她班次名出線的同學!而且第四名也有獎牌,她卻沒有。她很失望,在街上已經哭了出來。她一直對自己拿獎牌有很大期望,所以非常失望。甚至說:「我下年唔會再參加了,我怕又拿不到獎牌。」

2. 中文科活動日當天有一個猜燈謎比賽,結果公佈後,她幽幽地告訴我,明眀她與另一個同學是一起猜,一起寫下相同的答案,卻只有那個同學是全對,她的名字卻不在優勝者名單中。她覺得這個世界是沒有公平的。我鼓勵她去向老師詢問一下,看看自己的答案是否也是全對,但她卻不願意。我也學習尊重她的決定。

3. 英文考試當日,她說她未做完試卷,老師讓她有多幾分鐘繼續做。其他同學都收拾好自己的物品,自己卻還在做卷。她説當時差點掉下涙來。我幫她解讀她的感受,問她是否覺得很尷尬。她說是啊,我讓她哭了點,也讓她看見老師也體諒到她而讓她有多一兩分鐘的時間做卷。

我很慶幸,天父讓我可以有這些貼身的空間去跟妹妹有這些貼心的對話,讓我知道妹妹在校的狀況,也讓妹妹感受到媽媽很願意聆聽並接納她的情緒。

最近大中小學生自殺的消息如此多,我也有趁機跟對自己要求很高的妹妹傾下⋯

媽:最近有好多個學生因為讀書好大壓力而跳樓自殺呀。
莉:吓?不過我就唔會喇,因為我好怕死㗎!(怕死都有好處)我都唔想你地死呀!
媽:我都係呀,我都會好唔捨得你㗎!我都唔捨得我爸爸媽媽死。婆婆公公都好惜你㗎!
莉:我都唔捨得婆婆公公⋯婆婆公公成日照顧我,買野俾我食。
媽:好彩我地死左之後會響天堂再見,不過婆婆公公就未相信耶穌囉⋯
莉:我好想婆婆公公信耶穌呀!
媽:咁我地要繼續為佢地祈禱啦!

幸好,這對話讓我知道,妹妹覺得生有可戀,而我們家人彼此的愛正是生有可戀的基石!我在最後,當然不忘加一句「假若以後你有什麼心事,記得跟我或爸爸説!」願神繼續帶領妹妹在學校中的各樣適應和學習。

妹妹今天放學時給我的願望紙飛機⋯(註:願望2是考試科科100分)