Sunday, June 24, 2012

First encounter with Baileys

昨晚晚飯後,爸 B 倒了一小杯 Baileys 咖啡酒飲,兩個女兒知那是酒,小孩子不能喝,但仍然很新鮮地問長問短。爸B 讓孩子嗅一嗅酒的氣味...

妹:好似手指甲(油)味喎!
(又係幾似,因為指甲油同洗甲水都有酒精成份)
姐:好似咖啡味!
(最正確,因為正是咖啡酒)
姐:仲有啲泥膠味!
(我再拿杯聞一聞,又真係有啲泥膠味。何解呢?)

之後我們繼續討論為何小孩子不應該飲酒,妹妹在發表她的偉(歪)論...

妹:飲酒會老架,好似太婆咁老架!=_='

Saturday, June 23, 2012

阿比熟悉的香味

最近女兒們的洗頭水用完了,阿比選擇買了一樽她小時候用的品牌及香味...

冲涼時,阿比不斷說好香好香,狀甚興奮...

媽:你覺得好香,好鍾意果隻洗頭水呀?
比:係呀,因為係我細個時候用架嗎!
媽:細個,係響 X 姨姨道嘅時候抑或係響媽咪呢道嘅時候呀?
比:響 X 姨姨道嘅時候
媽:你返咗屋企之後我哋都仲有用呢個牌子架!

我一直以為氣味對小 baby 來說才是最重要,想不到兩歲前的一種熟悉氣味對於一個已經六歲多的孩子仍是如此如獲至寶一樣。人身體的記憶,真不能低估。

同場加映阿比 cutie 的禱告...

比:天父呀,我同妺妺呢都好驚曱甴呀,請你唔好再造曱甴喇!奉主名求,阿門。

Wednesday, June 20, 2012

繼續舉一反三...

昨晚晚飯後,爸爸有胃氣...

莉:爸B你唔好 urrd 喇!
爸:(更把頭靠近妺妹)urrd!
莉:爸B你唔好 urrd 我呢道喇,我唔係廁所黎架喎!

~~~~~~~~~~~~~~~~~~~~~~~~~~~~~~~~~~~~~~~~~~~~~

我們常笑說因為妹妹出生於溫哥華,所以英語是她的鄉下話,昨天又有力證...

電視上兒童節目有位外籍人士教英文...

莉:(指著背景板的圖畫)點解咁多食物嘅?
婆:叔叔今日教食物囉!
莉:咁點解佢冇講 eat 嘅?
婆:因為佢今日唔係教 eat,係教 smell 囉!

另晩飯時,妹妹吃完碗中最後一口...

莉:no more eat!

雖然正確來說應該是 no more food or no more to eat, 但以一個未夠三歲未上幼稚園且家中並不是說英語的孩子來說,已經給我們很大的驚喜!

後記:一天之後,艾莉在完成晚飯後竟然說:no more eating!這個比起以上的更準確!我們問妹妹她是從哪兒學的,她竟然說是電視!

Monday, June 18, 2012

昨晚與女兒們的對話

昨晚爸爸用熱水殺了一隻曱甴。阿比蹲著看著其屍體,問我...

比:佢有冇爸爸媽媽架?
媽:有!每個人(生物)都有爸爸媽媽架!
比:(想了一會)咁曱甴爸爸媽媽會好掛住佢架喎...

阿比真係好sweet!不過有點bittersweet -- 我又想起她與生父母分離的事實...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

忽然拿了阿比生父母的照片來與阿比的畢業相對照一下...

爸問莉:佢地係邊個黎呀?
莉:家姐生父生母囉!
媽:咁你嘅生父生母呢?
莉微笑的指著我,指著爸爸...

再一次證明,未夠三歲的孩子是可以明白的!

Wednesday, June 06, 2012

舉一反三的妹妹

每早,假若妹妹在我出門上班之前已經醒來,我出門時都會跟她說,拜拜妹妹,記得聽婆婆公公話!

昨日,妹妹起來時,見我已經換了衣服準備出門,自己講定:拜拜媽咪,我會聽話架喇!

連媽媽的對白都搶來說!但真的不能不佩服她的轉數。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

昨晚,與家姐吵了一兩句,妹妹走進房時,口中唸唸有詞的說:真係吖,乞人憎!

我一直都跟女兒說,不要說「乞人憎」,因為怕她們說得太七情上面,惹朋友仔不喜歡。聰明的妹妹知我不喜歡她這樣說,每次想說時都把它說成「黑人白」。

媽:你頭先講乜話?
莉:真係吖。
媽:仲有呢?
莉:(唔肯講)
媽:你頭先話,真係吖,喇拿喇(其實係那些音)喎!
莉:(知道自己逃不過媽媽的追問,唯有自招)乞人憎...
媽:你話邊個乞人憎呀?
莉:我自己囉!

那一刻我再也忍不住大笑起來!我實在佩服艾莉的辯才!可要跟她鬥智鬥力呢!

M & M 姊妹傻氣笑語集(五)

艾莉最近迷上「耀舞長安」中卞玉嫣,每次玉嫣姑娘一說話,她就跟著說。日間不時都以卞玉嫣自居,也有看見她坐在地上扮演玉嫣跳舞扭傷腳的一幕!!!

媽:愛你呀妹妹。
莉:你話愛你呀卞玉嫣丫!
媽:卞玉嫣唔係我個女喎!
莉:(想了一陣)咁你話愛你呀妹妹卞玉嫣丫!
媽:...... 乜你個名咁長架?

有時家姐都頂佢唔順...

比:呢道冇(姓)卞,呢道係(姓)鄭架!

~~~~~~~~~~~~~~~~~~~~~~~~~~~~~~~~~~~~~~~~

好學的艾莉有時會問我某樣東西英文點講,我也順便多問她幾個字...

媽:咁車英文係乜?
莉:car
媽:小巴呢?
莉:minibus
媽:警察呢?
莉:(遲疑了半晌)Yes-sir!

咁 yes 同 sir 都真係英文字既...不過好明顯係睇得電視劇太多囉!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
在餐廳,店裡職員在更換燈泡...

爸:如果燈熄咗會點呀?(我覺得答案應該係會好黑之類)
莉:會發夢囉!

真係估佢唔到,一連跳了咁多 steps!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

這星期媽媽病倒了,我告訴妹妹暫時不能抱她錫她,因為媽媽病會傳染。她也沒有再叫我抱。晚上...

莉:我可唔可以瞓家姐張床呀?(平時妹妹睡在我們中間,家姐則睡在我們床邊的床鋪)
爸:點解要瞓家姐張床呀?
莉:因為我唔想病。
爸:咁家姐瞓邊呀?
莉:瞓爸 B 媽咪中間囉!
爸:咁家姐咪會病囉!
莉:(唔識答,但個樣很凝重,因為個問題好難解決)

爸 B 唔好太難為一個還是 ecocentric thinking 的兩歲多孩子吧!不過由此我們發覺,艾莉又真的很像我,因為我每次遇到兩姊妹其中一個病,都會好敏感好神經質,要隔離她們,以防交叉感染。原來,艾莉的性格跟我十分相似!兩個都是 anal stage,都很神經質!或許換個角度來說,她很懂得保護及保養自己吧!我留意到她便便不暢通的日子會主動多夾蔬菜來吃呢!相對阿比較像爸B,都是不拘小節,大無畏的...

媽:家姐你瞓唔瞓媽咪爸B中間呀?
比:瞓!(心中當然一萬個願意)
媽:但係你唔怕媽咪病咩?
比:唔怕!

我愛我兩個截然不同的女兒!!