Sunday, October 25, 2015

妹妹的小學生活續篇

上小學兩個多月,下星期也第一學期考試了,艾莉倒也算適應得不錯。有一些點滴,很想替她記下⋯

莉:個個都話小學好多嘢玩,但係我覺得都唔係嘅,都冇玩具玩,仲要上咁多堂,咁長時間⋯
其實,阿妹你講得一啲都冇錯,小學確實唔係玩嘅,係讀嘅⋯⋯

莉:我平時會幫乜乜(同學)寫家課册⋯⋯
媽:乜乜(同學)係咪寫字比較慢呀?
莉:(眼睛碌碌)你唔好咁樣話人喇!

莉:我今日同乜乜(另一同學)一齊合作,分享一杯燒賣呀!
媽:點合作呀?
莉:我有個五蚊,佢又有個五毫紙,我地咪一齊買左杯燒賣囉!
真係人地出豉油你出雞!不過呢啲好朋友情誼好難得,值得記低這可愛片段!

主日學好友在適應小一時遇到一點點困難,艾莉知道後,悄悄地跟我說⋯
莉:等我星期日教佢 -- 嗱,你響操場睇下邊D同學係自己一個嘅,就走埋去同佢講:「我可唔可以同你一齊玩呀?」我都係咁識乜乜(同學)㗎!

莉:(哭著説)今日小息乜乜(同學)唔肯同我玩,仲叫埋乜乜同乜乜都唔好睬我呀!
媽:點解呀?你地鬧交呀?
莉:冇呀!
媽:(突然想起之前一日妹妹説過老師叫她不要再借紙巾給這同學)係咪因為你冇借紙巾俾佢,佢嬲左你呀?
莉:可能係⋯
媽:咁如果俾你再揀,你會唔會借紙巾俾佢丫?
莉:唔會,老師唔俾丫嘛!
媽:咁你都知道自己冇做錯啦!如果佢要嬲你,咁都冇辦法啦!聽日再試下同佢傾下偈,睇下佢仲有冇嬲啦!
翌日,當然兩個女孩乜事都冇啦!

莉:我一直都唔明白,點解乜老師同乜老師成日都會幫乜乜(同學),我覺得咁好唔公平囉!
媽:你唔係話乜乜好需要人地幫嗎?
莉:係,但係老師幫佢既話,佢咪會啱哂囉!應該剩係叫同學幫佢嘛!
媽:你係咪好擔心老師幫左乜乜之後,佢就會攞一百分,而你又攞唔到,所以覺得唔公平呀?
莉:(眼濕濕地點頭)
媽:你記唔記得媽咪同你講過,天父造家姐時造佢係學嘢慢D,要用好多時間先學會呀?其實媽咪都覺得咁樣對佢唔公平㗎!佢都冇做錯,但係學極都唔識。所以老師同媽咪要幫佢囉!咁乜乜都係一樣需要人幫囉,所以唔係唔公平㗎!

我好慶幸,因為阿比的緣故,我可以讓艾莉開闊了她的眼界,看得見這世界其實也有很多跟她情況很不一樣的人,我們如何明白、接納、擁抱他們的不同。這個公平不公平的課題,連家長老師也好應該去探討呢!

這兩個月來的反省與感受是:升小學其實對幼稚園生來說是極大極大的適應。或許因為妹妹的幼稚園是間happy school吧,所以突然要靜靜坐在課室內,一連上那麼多課;上課又是老師講的多,她們體驗的少;早上倒塔咁早起床返學,一直至三時多才回到家,稍事休息之後又要開始做功課,真是工時長過一般打工仔呢!説實話真的很心痛。

最令妹妹不習慣的是由本地學券幼稚園轉到一個很多英語的學習環境,她的心情是有點膽怯的。以前學券幼稚園哪來默書?現在每天都要溫習預備默書記中英文生字,實在很大的適應,慶幸見她也慢慢接受,偶而的逃避情緒也越來越短了。

我在問自己,為什麼家姐升小學時我沒有這麼多感觸?回想當年的情況,或許我和她一樣有很大的適應,我自己也自身難保,招架不住。每天早上要送阿比上學再趕返工,工作中毫不輕鬆,回家又再與阿比戰鬥下半場,身心俱疲,我自己也在經歷抑鬱和低谷,怎可能有時間感觸呢?謝謝這些年來天父的愛護、帶領和支持。

欣賞阿比的純真

晚餐桌上,大家在研究那兩隻蟹⋯
莉:呢隻係媽媽來的!
媽:唔係,應該兩隻都係公蟹來的!
比:吓,咁係咪我地唔食得㗎?

傻瓜,冇人話女仔只可以食媽媽蟹,唔可以食公蟹喎!

一天早上正在港鐵月台,廣播説因為車上一位乘客有特別要求,所以列車班次受到阻延⋯
比:乜野要求呀?係咪「我唔要坐呢架車,我要坐另一架車」呀?

真係天真無邪得笑死我,但仍很欣賞⋯

Thursday, October 08, 2015

令人笑到眼反的加力

百厭的加力有一天在家攀爬傢俬,被我罵叫停⋯
力:(自圓其說)我係馬騮黎㗎!

一晚臨睡前,艾莉與加力在牀上玩得興起,艾莉大半個身體壓在加力身上⋯
媽:妹妹,你咁樣會壓死細佬架!
艾莉起來後,加力笑笑口説⋯
力:我死左喇!

有一個早上,外婆離開我們家時⋯
媽:快D去送婆婆啦!
力:我唔送婆婆,佢自己行⋯

有天與一位友人在外吃早餐,加力在喝我那杯熱飲⋯
姨:加力,好唔好飮呀?
力:唔好飲⋯
姨:點解唔好飲呀?
力:你—唔—好—飲

笑反了我們!

Wednesday, October 07, 2015

未來的大富翁

昨晚,艾莉因為常識科功課而在「設計」問題去訪問校長。我們在討論想問校長有什麼夢想時,我心血來潮問坐在我大腿上的加力⋯

媽:你嘅夢想係乜野呀?
力:大—富—翁

我絕對覺得他答那問題時腦袋裏是家裏那盒大富翁遊戲棋,但此時此刻給我這答案簡直是神級!既然阿仔你有咁遠大的理想,咁你要努力加油去讀書和做事,就一直向你的夢想進發吧!