Wednesday, November 14, 2018

油不是八十年代

最近金庸逝世,電視台又把他的80年代舊作搬出來播⋯

一晚加力在盯著電視上的「鹿鼎記」⋯
力:媽咪呀,你出世嘅時候係咪古代嚟㗎?
媽和莉:(爆笑)梗係唔係啦!
你阿媽我一定係幾百歲啦!

阿比在晚上看過「鹿鼎記」中康熙皇帝,早上又見到「神鵰」中的楊過⋯
比:咦,乜佢唔係皇帝嚟㗎咩?
係為母不應該一次過看兩齣不同的戲⋯ 不過阿女,雖然兩部都是古裝,但好明顯地係不同朝代喎!
至少,佢認得年輕的劉華⋯

艾莉在處處比較她幾年前看的大陸合拍「神鵰」版本,30多年前的製作當然是低清,化妝又奇怪,又冇電腦特技效果等等⋯不過最好笑仍然是她看到李莫愁和洪凌波的道姑裝扮⋯
莉:嘩,做乜嘢將枱布著上身呀?

Monday, November 12, 2018

記五歲的加力對領養的看法和感受

好像較少去記錄加力對領養的看法和感受,或許是媽媽變得懶了,又可能是領養這題目在我們家已經太自然太家常了。

有一天,加力在午飯時跟堂哥們及堂妹一家坐在一起,他忽然問嬸嬸⋯
力:堂哥堂妹三個都是你生的嗎?
嬸:係呀!
嬸:(想知佢在諗乜)咁你呢?
哥:佢咪係伯娘生嘅囉!(好順理成章)
嬸:唔係呀,唔係伯娘生㗎⋯
(雖然嬸嬸跟堂哥說過很多次領養這話題,他仍然每一次聽都像新的一樣 😜)
哥;咁你係邊個生㗎?
嬸嬸說當時加力面上有點尷尬,但一直都是微笑不語。
我之後當然有跟他談談心事⋯
力:我唔想同佢地唔同⋯

有一次,教會一位姊妹問起加力的英文全名,我說起他的middle name 是他的本名(他生母為他改的名字)的譯音,阿比的middle name 也是她本名的諧音云云⋯⋯ 加力忽然走過來抱住我⋯
力:你係最好嘅媽媽!
或許這是他第一次聽到自己的middle name是我們刻意想保留他的本名,所以忽然感受到我們對他全然接納令他有如此sweet的舉動!原來名字對孩子實在非常重要!

Tuesday, September 04, 2018

爸爸媽媽考驗課

暑假過去了,新的學年又開始。今年加力升高班,要為張羅小學學位而操心,正正是考驗父母對天父信心的時間。

我常常在問,怎麼樣的學校是最適合加力的?他是一個怎樣的孩子?我們家中看重的價值和怎麼樣的學校才是最配合?越問,我越來越覺得加力真的未必考到或適合私校直資。他反應快,但在陌生人面前不會太願意答話。他創意無限,做事沒有既定框框,卻不會像那些模範學生那樣會乖乖有禮坐定。我和老公也對他的快轉數和大創意很驚喜和鼓勵,家𥚃也並非零電視和零電子產品。可以想像,他面試時應該會對老師說他最喜歡做的事是看電視卡通片,最喜歡與爸爸做的事是玩「足球小將」遊戲。我們是否不應該玩私小直資這遊戲呢?

現在未上陣已棄權又有些掙扎,幸好我們一直都只是shortlist了四間,輕鬆地試著吧!We do our best and God will do the rest if He thinks this is good for him. 即或不然,我們也會學習接受天父的安排。

津小的申請我們當然會參加。自行分配階段卻因為細佬不是首名孩子,又不能靠姊蔭(艾莉讀女校),只有10-15分。我們不想自動放棄(其實擁有10-15分與自動放棄沒有分別)這自行階段,所以看中了一間跨區有時限新校。新校無世襲位,在教學上也沒有太大的包袱。看上去像是一間肯創新的學校,其實十分適合我們這一家的氣氛。雖然跨區,也幸好有一架小巴直接去到(又要再開始接接送送的生涯)。至於入到與否,真的要等神的安排了。

心目中的排位當然是上文的津小,畢竟不用付學費對我們家的經濟幫助很大(阿比的學費也不便宜)。偶爾夜深人靜時,面對著這麼多的未知,也會湧起莫名的擔心,不過剛過去的星期日,天父透過傳道提醒我:不是靠我們自己的聰明,要放手讓祂去帶領我們的腳步。好好的提醒!作家長的功課真的永遠也學不完。

Friday, June 01, 2018

弟弟的神邏輯

有一天正在餐廳外等位時,弟弟得戚地問⋯
力:300 + 600 係幾多呀?
媽:你話呢?
力:900
友媽:(扮驚奇)係900咩?唔係800咩?
力:(有點嚇窒,在抓頭)
友:(不忍心)係900呀⋯⋯
力:(知自己冇計錯,重拾返笑容)
友媽:我唔識計,你教我點計吖!
力:(有點尷尬地笑)佢扮唔識禾⋯
世事都俾你看透了,弟弟⋯

弟弟在學校英文班弄了一個警察面具⋯
爸:你係咪話過你將來想做警察呀?
力:係呀!
爸:你鍾意做警察係因為可以捉壞人定係可以揸槍呀?
力:揸槍
力:揸咩槍呀?玻璃窗呀?
弟弟,你係師承周星馳定係黃子華架?

一日跟弟弟去麥當勞吃東西,鄰座有一個食客用手機煲劇。突然電話鈴聲響起,他拿起另一個電話傾⋯
力:佢有兩個電話嘅?佢係的士司機嚟㗎?
原來現今社會,有多過一個電話的人不是生意人,而是的 · 士 · 司 · 機 !😜😜😜

有一天吃飯時⋯
力:爸B,我想食多一舊鴨呀。
爸爸把差點吃進口的鴨拿出來,放在弟弟的碗中。
力:我唔食口水雞㗎喎⋯⋯ Hm⋯ 口水鴨㗎喎!
爸:你係話你唔食有「口水」嘅「鴨」呀?
口水雞可是另一款菜式呢⋯⋯

有一天弟弟與我們家以前的工人姐姐傾偈⋯⋯
力:Auntie G 係菲律賓人,英文點講呀?
媽:Filipino
力:Auntie G a Filipino
G:Yes, I am a Filipino. And what are you?
力:(一頭霧水,當然唔識答)
媽:You are a Chinese.
G:Are you a Chinese?
力:No, I’m Hong Kong Chinese.
我很意外,佢英文真係幾ok,仲懂得在Chinese之前加Hong Kong!我地係真 · 香港人!

Friday, May 18, 2018

三姊弟的日常 ⋯⋯ 笑料

妹妹被蚊子咬了眼皮,腫起了。經過幾天,終於消腫得七七八八。
莉:我諗聽日我隻眼應該唔再腫啦!
力:你點知聽日你隻眼唔會再腫呀?
(見艾莉沒有反應,自問自答)希望在明天吖嘛!
係香港人先識得笑,我地係香港人。

比:打你不死歌星夢
😜🤭😂😂

有一晚晚餐桌上玩中文接龍⋯
爸:胚胎個胎呀⋯⋯
力:⋯⋯ toilet個let呀
莉:Let it go 個 go 呀
比:Go away 個 away
媽:Away in a manger 個 ger
力:啫啫個啫⋯⋯
多謝大家嘅配合,我地成功由中文接龍無縫交接到英文,之後又回到中文的懷抱⋯⋯

細佬經常在沙發上吃東西,弄到食物碎片周圍都是⋯
媽:你食到周圍都係,今晚曱甴就會來咬你嘅耳仔!
力:(天真地)佢點知係我呀?
係喎,餅碎又無記認嘅⋯ 不過你有張良計,我也有過牆梯⋯
媽:佢聞到係你㗎嘛!
說得(好像)很有道理(雖然其實無),所以他死死地氣清理那些碎片⋯

一次在升降機內,𨋢內除我們之外,有一位男士。我們將要出𨋢⋯⋯
比:(對弟弟)你讓開俾人出先啦!
力:點解要俾人出先呀?
比:因為你係男仔囉!
力:(指著同𨋢的男士)咁佢都係男人啦!
家姐一定唔可以跟細佬鬥咀,因為她毫無還手的能力 😅😅


Friday, May 04, 2018

每天欣賞女兒們的特點

女兒們的普通話老師教她們看脷苔知健康⋯⋯
莉:佢話有脷苔即係就嚟病喎。
比:吓?脷苔?(思考了半秒後)會生BB㗎喎⋯⋯
究竟係太天真定係玩野?若你不認識阿比,你一定覺得呢個人玩野⋯

有一天在商店裏看到一些刻了文字的種子⋯
比:係咪呢D種子長大之後,會唔會仲有果D字㗎?
雖然我都有一刻諗過,但我唔會真係咁相信。我真心羨慕她的那顆赤子之心。

比:我地玩乜嘢呀?鬥畫畫好唔好?
力:好!
比:咁點鬥呀?鬥靚定鬥醜樣?
我忍唔住笑了出來,點解會有人畫畫係鬥畫得醜樣架?
不過,其實我想多想,或許是阿比一直覺得自己畫得不好,所以不敢鬥靚⋯作為媽媽,看到她這樣,有點心疼。

最近,我從艾莉自己和她同學們的媽媽口中,都知道原來妹妹真心覺得Remedial class好好玩,並在言談間介紹給她的同學仔,已經不止一次她身邊的同學都跟她們的媽媽說想上Remedial class。 🤭
友:點樣先可以上Remedial呀?
莉:你考試考低分D,唔合格咪可以上囉!
我希望佢朋友唔會真係當真,求其考試吧!不過我很安慰,因為看到艾莉在同儕之間真的很有感染力。可以做金牌sales呢!

Saturday, April 21, 2018

Don’t give up on the bigger picture

這陣子,妺妹在校的成績不太好,她自己也有很大的挫敗感。

我這幾天在想,當年幼稚園畢業拿品學兼優獎的她,為何現在有留班的危機?是我不應該幫她揀這間學校嗎?是否我們不補習不操練的生活方式在這制度生存不了?她在屋企附近的津校會開心些嗎?

朋友家人們都說:她努力的話應該OK,佢咁醒!我心裏很感謝他們如此相信艾莉。雖然我也一直這樣相信她的能力,但此刻真的有點點不確定 — 為何升了小學三年以來,她還是未可以完全掌握得好?

心情陰陰沉沉了幾天,有一晚夜闌人靜時,神讓我回看阿比找尋合適學校的路 — 當年不也是有著很多很多次覺得苦無出路的時刻嗎?苦撐苦捱了過去,前面又有一條新路。或許有時我們需要忍耐「等待」。很多時候不一定神會應許,不過一定會是神同行。神一直同行守護阿比,難道祂今次不會與艾莉同行加力嗎?我要做的,不是一直質問自己可以為她多做些什麼,而是更要切切為她好好禱告。

這星期尾聲,看著艾莉為到她喜愛的活動忙碌興奮,又切切感到她的人生並不只有學業成績,也感到她的信心力量泉源在哪。

Don’t give up on the bigger picture.      ~ X-Files Season 11 ep 5