Thursday, November 20, 2014

過了三個月試用期

很多人都問我,做全職媽媽慣唔慣。我真的不用太多適應!或許因為之前三年在溫哥華全職在家的經驗,又或許我真心喜歡與我的女兒在一起。最近有人問我有冇掛住返工的時間,對不起,真的沒有這樣想過⋯

三個月來,日子是怎樣過?對阿比有幫助嗎?我不敢説對阿比的功課有很大的幫助,但對我就肯定是正面的。縱然每天晚上仍會因為功課溫習的緣故跟阿比在拉据,但我日間的時候有時間休息,親近神和照顧家人,這是極寶貴的。

早上送完女兒上學,我會早兩個站下車,沿馬鞍山海濱長廊走回家。這是我的運動時間,也是寶貴的親近神的時間。神不止一次在這海濱跟我説話,特別在我前陣子考慮及申請領養之時。我也曾在海濱流著淚求問神對阿比學習艱難的心意,也感激天父始終與我同在同行。

除了在海濱親近神外,我也參加了Bible Study Fellowship (BSF)。每個星期一次聚會聽道分享,回家也要努力做功課查經答問題。我很珍惜這幾個月查考神話語的機會,因為我知道弟弟回家後,我就沒有這空間去做功課上堂。我也覺得弟弟在半年之內也不適合離開我自己去上BSF兒童班,因為阿比以前來的時候極需要我給她的安全感,我預備好全天候與小加力在一起幾個月了。

做家庭主婦最重要的任務就是煮!我沒有背起主廚的責任,只是負責買和前期預備工作,當然有煲下湯、煮午飯、煮小食,以及在老公不回家吃晚餐時煮晚飯。可以為家人打點吃的,是很幸福的。

比:媽咪呀,我覺得你煮嘢真係叻咗好多喎!
莉:媽咪呀,你煮嘅嘢味道一流呀,我覺得你應該開一間餐廳呀!

啲女雖然誇張咗,但好sweet!

這三個月另一個寶貴的地方是可以有機會讓我每星期去探望我年老的外婆外公。這是我一直想做的事,因為他們是我珍愛的,我很希望他們感受到我的愛與關懷,亦希望他們有機會相信主。以前工作家庭兩忙,根本沒有時間見到面,更惶論讓他們看見我們的生命而告訴他們有神是多麼好。這些短聚,看見他們滿足的笑臉,很感恩可以如此服侍他們。我也希望,透過身體力行,女兒們也可以耳濡目染,也視孝順長輩為重要的事。

整體來說,連老公都覺得我做了家庭主婦後,整個家庭的生活質素都提高了!真值得!況且我實在很享受跟兩個女兒的親密相處,我也感受到她們有我接接送送返放學的日子是特別興奮的!從她們眼裏的光芒和身體彈下跳下的狀態就可以感覺到。可以這樣生活,真的要謝謝老公,也更要感謝神的供應。

一月,我將會被指派有新加的任務,我會全力以赴,做到最好!


語言的藝術

Disney Frozen的熱潮仍繼續⋯
比:我係Princess Anna, 因為我個名係A字頭。
比:阿妹就係Queen Elsa,因為佢係E字頭。
媽:咁弟弟呢?佢係C字頭,咪係Christof 囉!
比:原來佢唔係K字頭架?
成家都係癲嘅⋯

妹妹對語言好有興趣,亦好有sense...最近是英文單數與眾數⋯
莉:咁一架巴士係咪'bu'(畢)呀?
媽:(失笑)唔係,一架巴士係bus。
莉:吓,但係佢有s喎!
媽:巴士單數係bus,眾數係buses。有D字單數都有s架!
莉:咁'but'嘅入口個'but'英文點講呀?(九唔搭八)
媽:係scoop。

Wednesday, November 05, 2014

雨傘運動引發的公民教育課

雨傘運動開始至今,電視畫面都令孩子有很多疑問,這正正考驗父母如何跟孩子講解香港社會在發生什麼事。

佔領初期,爸爸帶過阿比去旺角看看,所以阿比特別關注旺角。一個多星期後,阿比問了一個全香港人都問緊嘅問題:
旺角仲有人示威呀?幾時先完㗎?
我告訴她:
如果梁振英唔辭職或唔讓步的話,係唔會完嘅⋯

與妹妹討論金鐘的大集會,說起為何要在街上通宵留守⋯
莉:其實點解一定唔可以(俾我地)揀呢?
媽:因為中國驚我地揀果個特首佢地唔鍾意,所以要佢地揀囉!
莉:咁如果佢地揀果個可能大多數人都唔鍾意㗎喎!
媽:咁如果你有得揀,揀左一個,但係其他大部份人都揀左另一個,咁你會點?
莉:咁我唔會大聲話唔得㗎。
Good,欣賞她的政治智慧及明白小數服從多數的態度。

妹妹聽了我們對她解釋哥哥姐姐點解要佔中之後,自己對市民訴求的演繹:
莉:即係本來話你可以揀雪糕,但係就只係有雲哩嗱味(佢唔鍾意呢隻味),咁唔得㗎嘛!

昨晚阿比在聽著突首在電視上的講話⋯
比:媽咪呀,點解梁振英仲唔辭職嘅?我想個示威快D完喎。
媽:(點識答?無言,但笑不語)
比:係咪佢太鍾意話事呀?
媽:(更是無言,苦笑而不語)

在電視上見到689⋯
媽:你記唔記得人地叫佢個花名係乜呀?
比:(一臉疑惑)7-5-9?
759阿信屋真係比689更受香港人歡迎!我情願在街上開多幾間759好過仲響電視上見到689⋯

不知運動將來的結果如何,但已盡力讓孩子明白那是什麼的一回事。但願她們成長路中仍能保持明辨是非的能力,也有
行公義好憐憫的決心。為香港繼續薪火相傳⋯

妙語兩姊妹

與女兒們說起剛過世的Franky叔叔⋯
比:佢話下次再同我玩「天下太平」。
我:咁要響天堂再同佢玩喇。
比:得咩?
得嘅,得嘅,Franky叔叔會同你玩嘅。我們天家再見!

家姐要背遊子吟
比:慈母手中線,遊子體中衣⋯
原來遊子要睇完中醫先至遠行

比:呢道係快餐店嚟㗎喎,係咪要食快啲㗎?

電視蟲家庭在mytv看大結局,兩個自小看電視劇大的孩子的評語⋯
莉:今集係大結局,梗係會有好多人死㗎喇!
比:吓,咁就完㗎喇?
比:成日都係D人死左之後,最後又再見返⋯
佢地可以去做編劇

最近妹妹愛上三國志⋯
莉:我記得XXX, XX⋯仲有曹操個仔!
媽:曹操個仔叫乜嘢名呀?
莉:曹⋯⋯曹不!
媽:(不禁失笑)好好喎,你記得有個不字,但果個字係讀個丕字。
當我拿出三國志讓艾莉看一看個丕字,在旁的阿比插咀⋯
比:係曹不一呀!

妹妹放學時,其中一個大廈管理員很喜歡逗她說話。他通常叫她為「靚女」。

莉:點解叫我靚女啫?(呢個問題再大D佢應該唔夠膽再問)
管:咁你係咪靚女吖?唔通你係醜女?
莉:我唔係醜女!(極力否認)

又另一日⋯

莉:我唔想佢叫我做靚女呀!
媽:點解呀?你覺得自己唔係靚女呀?
莉:雖然我係靚女,但係都晤好咁叫喇⋯

與艾莉談論將要來的小學面試⋯


莉:乜嘢係面試呀?係咪考試呀?

莉:啲老師會問乜嘢問題㗎?係咪IQ題呀?


一睇就知呢個小朋友冇上面試訓練班喇!佢甚至係從未試過面試!在香港,不用經歷太多太密的學校面試,我看為是福氣⋯

Tuesday, November 04, 2014

迎接小弟弟的路上

面見社工 -
因為這是第二次的緣故,我們心情都很輕鬆,我們什麼也可以坦誠的聊,過程亦很順利。我自己的感受是,我很感謝我父母對我無條件的愛,在人生路上無論我做什麼決定他們都在背後全力支持我。我的家人(特別是我外婆)也很支持我們(上次如是,今次也如是)。心𥚃感恩不斷不止息⋯

八年(上次申請與今次的相差)過去,我們夫妻倆雖然因為照顧孩子的緣故而變得很少二人世界的時間,但心中的結連感並沒有減弱,反而更清楚對方性格的強弱點,更加可以包容及接納呢!感謝天父給我們這機會去審視審視一番彼此的關係。

良民證 -
我們今次與上次不同,因為家中孩子的緣故,我們分別去。我去做良民證那天竟然可以同counter的職員講解領養!佢仲有睇過集鏗鏘集㖭!很喜愛做個領養的代言人!

之後幾天,philip去做良民證時,竟又遇到之前同我傾左一輪領養的那位阿姐,佢主動問philip之前果個係咪佢老婆。傾下傾下,知道我地既情況,竟然主動話幫我們排條快隊!

天父的安排和供應真超出我們所想所求!

BB床 -
感謝各方好友義不容辭地把適用的BB東西送出給我們。像上兩次一樣,我們奉行環保二手的路線,可以不買的就不買,感恩天父的供應!

老公第三次築起嬰兒床,肩頭又重了呢!記得上次阿比爬上了嬰兒床,跟洋娃娃一起拍了很多照!今次兩女兒也爬上去拍了一些照片!看見她們臉上的興奮,很感動!


家訪 -
家訪的訪問重點對象是兩個女兒 -- 她們亦表現得不錯,可能因為她們心𥚃真心希望弟弟快點回家吧!她們可以包容及愛小弟弟的心相信社工從她們的對答中可以感受到。也謝謝我媽媽對社工表示會全力支持我們!社工跟女兒們說弟弟可能一月份回家,也或許可以早一點。

在家訪之前一晚,艾莉做了一個夢,夢見了力行弟弟來到我們家!她說弟弟臉蛋有少少肥,頭頂有一撮勾勾的頭髮。我問她弟弟有沒有哭,她説初時沒有,後來有。她也説她們有幫忙𢭃他笑。我叫她要在家訪時將夢境告訴社工姑娘,她也順利完成!



我們已經完成我們的部份,剩下的只是等待!祈禱天父給我耐性去等候,並相信這是天父最好的時機。

這是弟弟收到的第一份禮物呢!