語不驚人誓不休

一晚，去友人家吃飯。臨走時，好客的姨姨問加力⋯⋯
姨：今晚食左中餐，不如下次整西餐俾你食啦！你鍾意食咩餐呀？
力：（當大家以為佢會答什麼國家的時候⋯）兒 · 童 · 餐 ！
又真係好合邏輯喎，兒童梗係鍾意食兒童餐啦！

力：上數學堂用乜嘢機吖？
媽：計數機？
力：咁上歷史堂用乜嘢機？
媽：時光機！

有一次，加力回家時覺得很熱，在等𨋢時已經把外衣除了一半，我趕緊阻止他，把他的外衣套回身上，叫他回到家才除。就這樣，他的雙手就在外衣之下地入𨋢⋯⋯
媽：（見他沒有雙手的樣子，忍不住逗他）你係楊過呀？
力：唔係呀！（從下伸出他的雙手來）我係⋯四手天王！

同𨋢的另一位不相識的男士都忍不住爆笑！咁楊過同四手天王又真的是同一個人嘅⋯⋯

有一天，與妹妹說起什麼是「五馬分屍」，也說起死刑⋯
爸：你覺得應唔應該有死刑吖？
莉：唔應該，要佢死都幾殘忍。
爸：咁有冇一啲人你覺得佢地咁衰，需要死吖？
莉：（想了一陣）係咪即係689呀，特朗普果啲呀？
我們沒有繼續這個討論，因為實在笑得 · 很 · 辛 · 苦 ·

在太婆的火葬禮堂，棺木在按掣之後徐徐下降⋯⋯
力：下面係咪就係地獄呀？
Um... 冇咁直接囉阿仔⋯ 同埋你混淆左肉身同靈魂啦。

年初一吃飯，爸爸要用相機記錄一下他的傑作⋯⋯
力：相機食先？咁我地食乜嘢呀？

新春家庭影院我們看了哈利波特⋯⋯
力：隱形斗篷係法寶嚟㗎喎，問多啦A夢攞咪得囉？！
Think out of the box, man! 這樣的跨平台跨文化crossover可能有睇頭噃兄台！