Sunday, September 01, 2013

貓女兒的驚人語言與思維模式

媽:一陣落去買個八達通套吖!
比:仲要買 bra 喎!
媽:(心想一個七歲的小女孩買乜嘢 bra 呢?)買 bra???
比:要買 energy bar (做早餐)呀!

莉:我想食中環料理呀!
媽:係中華料理定中環料理呀?
莉:中環料理呀,即係小丸子果啲,佈置得周圍好靚果啲...
段估小丸子都係食中華料理而唔係中環料理掛!
媽:係中華料理,劉德華個華呀!
爸:(質疑)佢邊度認劉德華係邊個呀!
媽:妹,劉德華係邊個呀?
莉:按摩椅囉!
爸B真係低估左廣告嘅威力!不止劉德華=天王椅,還有:聖xx月餅= 天梯(陳豪),美x冰皮月餅=captain cool (張智霖),百x幫你日日賺=神探高倫布(黎耀祥)!

有一次在大堂看見一隻狗。入電梯後...
莉:我都想養狗呀!
媽:你唔係鍾意貓嘅咩?
莉:(想一想)我好想養一隻冇毛嘅貓呀!
媽:??冇毛嘅貓??無貓係冇毛架喎!
說到這兒,我們旁邊的哥哥仔實在忍唔住,笑了出聲,妹妹也很仇視地望著嘲笑她的我們... 我其實明白妹妹的logic -- 因為我們曾說過我們不想養貓,貓會甩很多毛。所以妹妹覺得養一隻沒有毛的貓,爸媽便會應承吧!很有意思呢!

最近妹妹嘅用字好令我們驚訝,好似好大人,但又未必真的用得最恰如其分。有一次妹妹與嫲嫲分享她那隻一拉會震動的飛機...
莉:嫲嫲,你感受下呢隻飛機吖!

妹妹有濕疹要搽藥膏...
莉:我唔想吸收到呢啲味呀!

有一晚乘車途中...
比:媽咪,溫哥華多啲(見到有)月亮,香港少啲(見到有)月亮。
我好欣賞阿比的觀察力!要多謝蒙特梳利教學法!我亦不忘趁機教育下女兒們為何在香港會少見月亮:原來她們以為香港多些雲,卻不明白是高樓遮蓋了我們的視線!

No comments: