與孩子討論信仰的難得機會

五月聖母月，妹妹的天主教學校有向聖母像獻花的活動。那成就了我和女兒一次難得的信仰討論⋯⋯

媽：記唔記得十誡𥚃面，天父話佢係唯一嘅神呀？所以基督教只會敬拜天父同耶穌。

莉：所以聖母唔係一個神囉！不過老師有講過聖母可以代我地向耶穌祈求，因為佢係耶穌嘅媽媽嘛。

媽：我地相信，耶穌升左天後，聖靈就住在我地每個人既心，我地其實可以直接向聖靈求。（下刪幾千字）

很開心可以同佢分享天主教同基督教的差別。妹妹有機會接觸天主教的思想，反而更有機會讓我們討論信仰。

那天晚上，竟然又有機會跟弟弟談信仰⋯⋯

力：係咪呢個世界個個都信耶穌架？

媽：唔係架⋯⋯ 你婆婆公公呀、舅父呀、太公太婆都未信耶穌㗎。

力：點解婆婆公公唔信耶穌既？

媽：因為佢地未覺得需要天父，未覺得天父錫佢地囉！

力：但係我錫佢地喎⋯⋯

媽：咁我地要多D為佢地祈禱，希望有一日佢地會感受到天父好愛佢地！

我記得我初做媽媽時，一位很有智慧的長輩說過，在聖經裏的偉大人物，他們的爸爸不一定是偉人，反而他們的媽媽在他們的生命中所做所教的很重要。而那些大人物，也不一定教出偉大的子女，關鍵在於有沒有敬畏天父的太太作孩子的媽媽。我把這個新穎的説法一直藏在心𥚃，就算未必可以教導他們成為偉大的人，也至少要帶領他們認識天父、敬畏天父吧！求主教導我如何引導孩子們，成為祂所喜悅的人。

邏輯王楝篤笑

教主日學，內容講以色列人在等待期間失去信心，造了一個金牛贖。

友：（故作神秘）牛牛會食人㗎！

力：咩呀？牛牛唔食人㗎！牛牛食草㗎喎！

力：豬肉朗馬峯

最近細佬對自己身體很感興趣，我們已經不下十多次告訴它那是叫睪丸。有一晚洗澡時，加力又再問⋯

力：呢兩粒係⋯肉⋯丸呀？

我估佢有D需要吃宵夜⋯ 😜

有一天在友人家吃飯，友人姨姨幫加力挾菜⋯

姨：你要幾多塊呀？

力：（思考了一下）九塊！

姨：（心想也太多了吧）問錯了㖭，好啦，俾兩塊你啦！

有一次加力的拇指受傷了⋯⋯

爸：你手指仲痛唔痛呀⋯

力：唔係手指呀，係手指公呀！

大家都係手指，用不著分得那麼仔細😜😜😜

做功課，加力常給我驚喜⋯

把交通工具連線到它們運行的空間時，加力說要把飛機連到天空和陸路⋯

媽：點解飛機要連住條路嘅？

力：因為佢行行行跟住飛上天囉！

佢真係啱嘅，但係我都係叫佢連住個天空算了⋯

另一日，要圈出會發光的物品，加力把雪櫃也圈了⋯

力：因為雪櫃開門就會有燈嘛！

我沒有改他，還在旁邊加上他的邏輯。實在頗欣賞他的創意和邏輯思考。只是，他應該會成為班房內外的多咀駁咀王，希望他將來的老師懂得欣賞他⋯

笑話四則

有一天，朋友叔叔一家來我家玩。叔叔打趣的問加力⋯

叔：你覺得你自己靚唔靚仔呀？

力：唔靚仔～～呀～你～

駛唔駛咁寸呀，「靚」仔？

有一晚，一家人在外吃雲南米線⋯

力：呢D係乜嘢菜呀？

媽：芽菜。

力：痴牙菜呀？

一天，我們去了一間古老禮拜堂去看一個聖經展覽。回家後我們告訴孩子們，當年爺爺嫲嫲正是在那間教堂舉行婚禮。

莉：真架？咁你地（指爸媽）有冇去呀？

我即時語窒，到下一刻才爆笑出來！艾莉見我們爆笑才意識到自己搞錯了時空先後次序⋯

媽：咁點解你冇來我地嘅婚禮嘅？

艾莉只能以笑遮醜⋯

阿比最近在儲「車站指南」，很用心的每去一個站就去票務處索取，希望儲齊一整套。

莉：其實點解要儲呢？

比：我鍾意囉！

爸：其實係個過程緊要，有好多回憶。有D人鍾意儲呢D，有D人鍾意儲第二D嘢⋯

莉：我鍾意儲錢多D喎！

這個喜好也不俗！我支持你，艾莉！

幾天後，我發現艾莉從公共圖書館借了這本書⋯她的確很認真呢！

三姊弟笑聲救地球

有一晚，客廳天花出現了一隻小昆蟲⋯

力：Spider-Man 呀！

我不容許細佬爬上飯桌，但他當然無時無刻都愛挑戰權威。有一次，我在房中探頭看見加力又爬上了飯桌，立即出言喝止⋯

力：你諗㗎？

力：你估㗎？

他一定不明白為何媽媽在房間內也會知道他在飯廳做的事情！他為什麼還不明白媽媽是會無所不知的嗎？

兩個小學雞家姐在用「出貓」來説笑⋯

比：你出貓！

力：喵～～

呢隻幼稚園雞真係好純真⋯

有一晚，阿比的不聽話令爸爸大發雷霆。細佬對此其實已經見怪不怪，在一旁揮舞著一條絲帶⋯

力：心—平—氣—和—

雖然那只是「功夫熊貓」𥚃的對白，但此時此刻説出這句話，我怎看加力也是一位智者⋯

艾莉迷上了飾演小龍女的陳妍希，我們介紹她看「那些年」的沈佳宜⋯

莉：我想睇「那些年」喎！

力：「經過那些年」呀？（阿姐的華麗轉身的第一句⋯）😂😂😂

Hmm... 細佬，個年代個地方同個feel完全搞錯了吧！？

在茶餐廳吃飯，身後的食客對附近的侍應姨姨説⋯

客：靚女，唔該俾杯水我吖！

力：吓？靚__ 女__？

當下真的不敢回望看那侍應姨姨有沒有聽見加力的言語，不過這是一個很好的機會讓我們教細佬一些人情世故⋯ 😜

有一次阿比跟細佬在耳邊説俏俏話⋯

力：你大聲D啦！

俏俏話再也沒有意思了⋯

Ben Sir 最近在大台很紅⋯

比：Ben Sir 係咪教粗口㗎？

媽：佢唔係專教粗口，佢係教廣東話啫（當中最為人熟悉當然是廣東話粗口吧！）

好文采的艾莉最近與同學作了這詩⋯

莉：清明時節臭崩崩

       路上行人臭到暈

       借問廁所何處有

       向前轉左再轉右

但願有一天她可寫出不是廁所文化的詩句⋯

從遲緩到天資聰穎

上星期五，加力學校派第一個學期的「成績表」。老師給他的評語是「天資聰穎」，之前也聽過老師口頭上說過他很聰明，我們也在日常生活中看得見他的反應其快。當我看著這個評語，卻忽然想起兩年前接他回家時，他所得的標籤是「整體發展遲緩」。我並不是想邀功，反而更加被提醒了可以在一個穩定的家庭中被愛護被照顧對孩子早年的成長是何等重要！我是如此幸運可以愛加力，見證著他每天的成長！

見證阿比的成長

為何小時的阿比跟現在的她樣子差別那麼大？

十年來同一個蛋糕樣式，我真的有恆心做得到！

定力測試

妹妹考完試，跟一班同學仔玩了一整天，不亦樂乎。媽媽們也可以交流了一整天，也倒愉快。一天𥚃傾得最多的，自然是女兒們的功課學業。（這班家長已經不是那些極怪獸，起碼她們會讓孩子們考完試後玩一大餐的，真正怪獸的，根本不會在這些聯誼活動中出現）

一路聽著她們説哪間補習社是專操她們學校的past papers，我也聽得膽顫心驚：要這樣狂操past paper，成績當然會好，但要讀下去就真的要這樣去操練女兒嗎？當其他同學都如此每天或每個星期去操練的時候，我的女兒沒有去操去補，那她的成績會越來越跟不上、比下去嗎？聽著聽著，真的很容易跌入現今家長追追趕趕不想輸蝕的心理圈套。

我不斷要提醒自己：要清醒！自己在家教女兒，期望她好好做功課，考試默書時盡了力溫習便可以了。考成怎樣，是否名列前矛，其實真的不是我可以控制的範圍。何況，假若要每天接送她往返補習社，則我和她和荷包也受不了，我還是想她有多點時間休息放空和玩樂吧！至於，升中時成績是否可以足以與其他同學競爭升上中學云云，我還是要調較自己的目標：升上自家中學也不一定是必然的目標吧！假若女兒的成績真的不及其他人，則勉強升上也很辛苦吧！不是上自家中學，但到其他合適的中學也不是世界末日吧！或許，在考上中學之前，我們已經頂不順這個教育制度而舉家移民吧⋯⋯

我跟妹妹傾偈，原來她們同學間也有在討論哪間補習社好與不好。我問她想不想跟其他同學一樣去補習，她一臉堅定（也許有少少不屑）地答：唔想！想不到她的意志比我更堅定！

在這世代做家長，真是少一些定力也不行。

兩姊弟的笑聲救地球

有天上了道風山，那兒的園林有一度很窄的門，紀念主耶穌叫人要為主棄闊路（easy way out) 走窄路⋯

爸：咁你估要點做先至可以行到窄路呢？

莉：咁減肥囉！

個答案咁潮咁in嘅？

一晚我們在飯桌上玩詞語接龍⋯

媽：火災！

比：災難！

力：唔係呀，係Joy to the World 呀！

爸：牆壁！

力：Shake-and-Bake!

弟弟在沖涼時，聽到一陣慘叫～～ 正當我走進去問他發生什麼事時⋯

力：冇事啦！唔駛關心我啦！

爸爸說起並解釋什麼是香港腳後⋯

力：我係台灣腳！

一晚，弟弟冲涼後廁所地下很濕，妹妹用地拖拖地之後，廁所門口就多了一張告示⋯

最近妹妹迷上了聖鬥士星矢，在模仿卡通中的出招招式⋯

莉：光速離子拳！

弟弟也不甘示弱，一於還擊⋯⋯

力：龜速離子拳！

妹妹的動作由光速變龜速，我們也上演笑聲救地球！弟弟當然一臉茫然看著我們笑得前仰後翻的樣子⋯⋯

痕之楝篤笑

爸：俾你地揀，你要屎味嘅咖喱定係咖喱味嘅屎呀？

正當兩個家姐在慎重考慮點揀好之際⋯

力：屎⋯⋯士多啤梨！

莉：你叫乜嘢名呀？

力：我叫力行，好痕個痕呢！（仲做埋抓痕的動作）

爸：吓？你搞錯左啦！你唔係叫力痕，係叫力行呀！行路個行呀⋯⋯

我愛我的「痕痕」⋯ 阿仔唔好要懶音呀！！

飯桌上放有多春魚⋯

力：我想食果D⋯

媽：你想食邊D呀？

力：我想食果條死魚呀！

笑死！放得在飯桌上吃的，全部都係死魚吧⋯

最近細佬學了兩個家姐，喜歡問人IQ題。不過佢D IQ題就奇怪左D同難答左D⋯ 有邏輯但又好似冇邏輯⋯

節錄了兩個經典的：

1.

力：巴士同的士一齊行緊，巴士同的士講：我高過你呀！的士又同巴士講：我矮過你呀！⋯ 咁你估點呢？

媽：（咁難答，本來好有邏輯地想答案，次次都錯後開始亂估一通）

力：要唔要開估呀？

媽：（梗係要啦，救命）要呀！

力：答案就係⋯ 撞車！

媽：（忍笑）係咪佢地唔專心揸車掛住傾偈所以撞車呀？

2.

力：紅羅白同腸仔講：我長過你呀！咁跟住點呢？

媽：（心諗，我點知點呢？個故仔咁多可能性）⋯⋯⋯

力：要唔要開估呀？

媽：好呀！

力：答案就係⋯ 拍左拖！嘻嘻！（掩咀而笑）

🙄🙄🙄🙄🙄🙄🙄🙄🙄🙄🙄🙄🙄

阿比加力的小妹

收到一個很震憾的消息 -- 原來阿比加力有一個小妹！

我們知道之後也有一刻想過應否及何時告訴孩子們，但我們都認為沒有原因不說或要等待其他時機説，所以一晚臨睡前，我告訴了三個孩子⋯

比：我好想要個妹妹呀！

媽：你已經有個妹妹㗎啦！（我要以防旁邊嘅妹妹不高興，好在妹妹沒有特別的表情）

比：我知！但係我真係好想要個親生嘅妹妹呀⋯

媽：（下刪一百字解釋我們為何沒有能力再領養）

比：媽咪爹D好殘忍呀！

媽：你講緊邊個媽咪爹D呀？

比：生母生父！

比：佢地好殘忍，令我地唔可以響埋一齊⋯

溫柔敏感的阿比連眼淚也掉下來了。我很明白她的感受，她説的也是事實，我沒有説太多去粉飾，只是認同她的感受及擁著她陪她發洩心中的鬱悶。

我想起他們四兄弟姊妹，分散四方。忽然，卻想起⋯

媽：（對阿比說）其實四個之中，你和細佬才是最幸福的兩個，因為你地可以一齊成長啊！

阿比聽後沒説什麼，不過我知她也認同，心情也就寬松了起來，沒再哭鬧了。

我也想把握這機會，希望可以性教育她們一番。特別是阿比，我真心希望她不要和不用走她生母的舊路⋯

媽：我估生母一定係好想搵到人去愛惜佢，不過一直都遇唔到肯愛惜同珍惜佢嘅人。其實搵唔到人惜自己，自己都要學識愛自己呀！

莉：點樣惜自己呀？

媽：就係就算你想搵人愛惜，去拍拖，你都唔好有性行為住囉！到你肯定佢係好人，同佢結左婚，先有性行為，先至唔會有左BB但湊唔到。

我看到阿比一臉茫然，原來她不知道什麼是性行爲。我邀請了妹妹去解釋（我之前跟她看書時有説過）

媽：阿比，你真係唔需要行你生母嘅舊路㗎！你要學識去愛自己呀！

我邀請她們為了生母可以學懂愛自己和認識天父禱告，也為小妹可以盡快找到合適的領養家庭而禱告，更希望我們將來可以與小妹和她的領養家庭有聯繫的機會！🙏🏼🙏🏼

幾天後，我再問阿比願不願意為生母祈禱，她說不願意，卻不肯說原因。我問她是否惱恨生母，令他們兄弟姊妹分散，她大力的點頭大聲認同。我沒有迫她祈禱，只想繼續聆聽和陪伴她。

至於我自己，明白到我們與小妹的路應該沒有交义點之後，我要學習的是如何放手⋯⋯ 我仍謝謝有機會讓我知道有妳的出現！送上無限祝福給我們的小妹！😘

韓劇家族 -- 「藍海」引發的妙語

細佬睇了兩集「藍海傳說」，提起美人魚⋯

媽：你係美人魚呀？

力：唔係，我係美人「男」呀！

我不禁失笑，我知道佢覺得自己係男仔所以要改為有個「男」字，但段估都係「美男魚」而唔係「美人男」啩⋯⋯

之後佢在遊戲室裏向新朋友介紹自己叫「美人男」🙄🙄🙄🙄

妹妹最近迷上中國古代服飾 -- 秦、唐、元、明、清

佢甚至問我：藍海傳說中的古裝戲係邊個朝代呀？Errrrr... 呀女，你搞錯左國家喎⋯⋯

戲中美人魚的眼淚會變成一顆顆珍珠，所以她要用膠袋袋著它們。一次我如常地因爲劇情而感動到哭時⋯

比：媽咪，你快D掛個膠袋接住D眼淚啦！

瞬間破涕為笑！阿比好嘢！

因為這韓劇，阿比說想去學韓文呢！

弟弟3.5歲時對領養的看法

有一天乘車經過弟弟住過的兒童院⋯⋯

媽：你記唔記得你住過呢道呀？

力：記得！

力：我好掛住我嘅兒童院呀⋯⋯

媽：咁我睇下有冇機會可以約到去探下佢地囉！

最近在搞加力的加籍文件，所以拿出很多身份證明文件放在枱上⋯

力：做咩呀？

爸：D文件幫你申請證件囉！

小小的腦袋很快就把身份證明與親生家庭連在一起⋯

力：我想睇下生母個樣⋯⋯

媽：當然可以啦！

一路看⋯

力：咁家家個生母生父係邊個呀？

媽：家家嘅生母係我，佢嘅生父係爸B囉！

力：（淡淡的）我都想你生我呀！

比：（剛在旁，也加把咀）我都想你生我呀！

媽：（擁著他們）我都想呀⋯⋯

昔日在阿比口中說出的句語，現在小如三歲的加力也會說！真不要少看孩子明白領養的能力，只要家長肯說，他們就可以明白到。

艾莉的豆皮老公

妹妺偶而吃飯也會扒剩一些飯粒。我不希望她浪費食物，所以用那老掉大牙的古老「吃剩飯會嫁個豆皮老公」學説去阻嚇她。誰不知，馬上見效，她大吃一驚，立即把碗裏的飯粒扒得乾乾淨淨。

第二天，她卻如釋重負地告訴我：其實我唔需要驚嫁個豆皮老公，因為我可以選擇唔結婚咪得囉！真係佩服這個新時代的女性！

讓她得戚了數天，被聰明的外婆一句KO -- 或者你老公結婚前冇豆皮，結左婚後先變豆皮呢？她又深信不疑，所以掙扎著繼續吃剩飯唔結婚好還是寧可信其有一定要個皮光肉滑的老公好呢？！

今早，她竟然堅定地跟我說我的豆皮老公學說是錯的 -- 因爲她在網上看到一段短片，破解了這個父母會呃子女的說法！相信，她很快就會將這些大人呃細路的技倆逐點擊破！

女，你可不可以不要大得那麼快，好嗎？

兩回尋根之旅

這個聖誕假期，不知不覺間為阿比與加力安排了各自的尋根之旅！

其實，因為阿比的緣故，我每次踏足長洲都會有一種返鄉下的感覺。上次帶阿比來時，她應該只有兩三歲，也沒有太多認知。今次她已經十歲多，所以我也趁機告訴她她的親生家庭可能跟長洲有淵源。

遊山玩水過後吃午飯時，我趁機問她對長洲的印象⋯

比：我唔鍾意呢道⋯

媽：點解呀？

比：呢道好舊⋯⋯

媽：其實如果你當初生父生母唔係冇能力照顧你，你可能就在這𥚃長大⋯

比：我都係鍾意馬鞍山多D⋯

很感恩你會珍惜你現有的東西，但願你會一直覺得領養對你來說是祝福多於失去⋯

另一天，我們趁空閒帶了加力到了他出生的醫院（在阿比較小時，我們已經帶過她到她出生的醫院看看）。他一直表現很興奮，一直提著我們會去「他的醫院」，甚至一上的士，他就跟司機叔叔說要去醫院。對他來說，真是一件大事。我們也趁機與兩女兒討論過生母可能遇上的狀況（只可惜加力年紀太小了，未明白，待日後再告訴他）。

我絕對覺得，雖未能跟親生家庭有接觸，可以帶孩子們尋找一些有關的足跡也是很寶貴的吧！

笑死人的細佬

飯後吃雪梨⋯

力：（一本正經）呢個中文叫做梨，英文就叫做啤梨⋯

Wait! 啤梨係英文嗎？莫非是通勝英文中pear被翻譯作啤梨？？

一晚，在屋苑前的花園玩耍。弟弟看見自己的影子，說：

力：我高左喎！

個影高唔代表你高左呀仔 😂😂

一晩臨睡，準備一家人祈禱⋯

媽：你出去同爸B講我地ready瞓覺啦！

力：（出去客廳）爸B我地wee-wee瞓覺啦！

這是細佬口中的「望眼鏡」...看著，的確可以望到很大隻眼！！

力：爸B係BB嚟㗎！

媽：點解爸B係BB呀？

力：因爲爸B有個B字，所以佢係BB囉！

力：我好咸呀⋯⋯

媽：你好咸？你 lam 過自己呀？

力：我咳咳咳，好多咸呀⋯⋯

媽：（失笑）你好多痰呀？

兩則令媽驚嘆的對話

力：媽咪，呢D係衰人嚟㗎！我貼哂佢地D眼呀！

我一望，呢兩個又真係埃及的「衰人」士兵喎！真係慧眼識「衰人」喇！

跟妹妹溫習Science Exam...

媽：有D乜嘢係signs of aging?

莉：腦退化、失憶、大腸癌⋯

媽：（狂笑）你答緊乜嘢呀？係wrinkles同white hair呀！

其實佢又唔算係錯哂，不過諗得太複雜太刁鑽啫！

做家長義工的領悟

這個學年，連弟弟也上學了，所以我有機會到妹妹的學校去做派飯派菜的家長義工。剛剛星期一去了一次，我很感恩可以對妹妹上小學的心情多了一點領悟⋯⋯

我開始明白為何妹妹過了一年多的時間，仍然會説她喜歡幼稚園多於小學很多很多。我看見她的小學老師是較幼稚園老師們嚴肅一些，有什麼不妥當就會直接指出來，孩子少不免會認為老師很兇很會罵人，並不如幼稚園的老師如此的溫柔婉轉有愛心有耐性。我並不覺得她學校的老師特別兇，反而是普遍的小學老師也是如此，或許這就是一種成長的經歷吧！我也引導妹妹去看得見老師也非一味只有兇，也有搞笑親民的一面。雖然，我並不可以為妹妹改變什麼，但至少我有此機會可以明白她的感受多一點。

我一直知道妹妹很希望可以在學校見到媽媽，所以我要爭取及珍惜這些做義工的機會。事實上，看到她望著派飯的媽媽甜笑著吃飯的模樣，我心也很滿足。之後與我媽談起妹妹滿足的甜笑時，我也説起當年偶而媽媽接我放學（落校車）我也會很滿足云云，說著說著，兩母女的面上笑意盈盈，心也暖烘烘的 ❤️❤️⋯⋯ 媽媽跟孩子的聯繫，就是如此微妙。

笑笑小孩語

弟弟飯後在砌LEGO...

媽：呢個係乜嘢嚟㗎？

力：呢個係「馬人」。

媽：咁呢D人響道做緊乜嘢呀？

力：佢地拜偶像呀！

😱😱😱😱😱三歲人仔竟然會想起這個場景⋯⋯O左咀

弟弟上學時在電梯中，說起昨天看韓劇時一個小片段⋯

媽：哦，你講緊尋日套戲⋯

力：唔係，唔係，唔係戲，係韓 · 劇 呀！

多謝施主嘅糾正！

逢星期五是加力學校的便服日，那一天，他自選了Spider-Man T恤。出門時，我看見他在爬地⋯

媽：唔好爬地啦，咁污糟，做乜爬啫？

力：（我係）Spider-Man...

明哂！你⋯⋯繼續爬啦⋯⋯

媽媽一年一度去髮型屋剪頭髮，弟弟來探班時⋯

髮：你剪唔剪呀？剪左會好靚仔㗎喎！

力：我而家都好靚仔⋯

自信心爆燈的小生 🙄🙄🙄🙄

認識了新的大朋友。大朋友問加力⋯

友：你有冇返學㗎？

力：返工⋯⋯

一招成功吸引到女孩子的注意⋯

一天，加力在喝荳奶⋯

力：可唔可以倒瀉㗎？

媽：你話呢？你未死過呀？

媽：（跟妹妹說）不過佢又真係未死過嘅⋯

力：（在旁輕描淡寫）死左。

同場加影兩個姐姐的笑語：

一天與妹妹搭地鐵時搭扶手電梯，一路上有廣播⋯

廣：請緊握扶手⋯

妹：（個扶手）咁熱，點緊握扶手喎？！

一早，為了快速叫醒阿比返學，我出殺手鐧⋯⋯

媽：快D起身，我地毛記電視條片出左啦！

阿比立即彈起身，走出客廳，開著電視～～～

媽：傻豬，毛記電視係上網睇㗎！唔係開電視睇㗎！

阿囡，我同情你，又真係幾混亂嘅：毛記電視唔係響電視上睇嘅，正如荔枝角公園唔係響荔枝角站，係響美孚站出咁難明⋯⋯

開學了的加力語集

弟弟生平第一次上學，倒也很愉快及適應。好笑的是最初早上要為他量體溫時⋯

力：但係我冇發燒喎！

就係確保你冇發燒囉！阿仔，你之後的十年都要咁量體溫㗎啦！接受呢個習慣啦！

因為返學的緣故，終於potty train了弟弟。有一天帶他去教會的女廁時⋯

力：我要去BB廁所！

我心想：這兒沒有小兒用的廁所⋯ 誰不知，他帶了我去了一個蹲廁的廁格⋯⋯原來這個低到不能再低的廁所就是他眼中的BB廁所！正！

媽：你個肚肚𥚃面有乜嘢呀？

力：耶穌囉！

主耶穌在你的心𥚃，但幾時走左落你個肚㗎？

一天，加力把卡通耶穌的貼紙貼在自己的身上⋯

媽：點解你將耶穌貼在身上嘅？

力：因為耶穌好愛我⋯

媽：所以你就貼佢響心口哩？

力：係。

Sweet......

蝸居沒有地方曬衫，所以利用了主廁晾衫。一天，弟弟要用廁所時，抬頭望著那些衣服⋯

力：好似响個森林咁呀！

Sorry呀，要你在森林𥚃辦工⋯

有一天，艾莉不小心用指甲刮到她自己的手臂，成了一道血痕。她給弟弟看她的血痕時⋯

力：流鼻血？

原來對細佬來說，血只會從鼻子流出來⋯

初開學，阿比告訴我們她的同學怎樣怎樣⋯

比：xxx原來係P1㗎！

力：我都係one 喎！

無錯，你都係one，K one！Good job 細佬！

三歲小孩跟媽媽談生母

剛剛臨睡前在床上⋯

力：邊個生我㗎？

媽：你嘅生母囉！你同家姐嘅生母。

力：咁我哥哥呢？

媽：你生母生左你哥哥、阿比家姐同你...

力：咁家家呢？

媽：我係佢生母。我生佢嘅囉！

力：爸B呢？

媽：爸B係家家嘅生父。

力：家姐（個生父）呢？我呢？

媽：你地個生父係唔同，但生母係同一個。

媽：你好掛住生母呀？

力：（點頭）

媽：你可以掛住佢㗎！家姐有時都會掛住佢㗎！⋯⋯咁掛住係開心定唔開心㗎？

力：開心！

媽：開心咁就好嘞。聽朝你醒左，我俾你睇下你生母個樣吖！而家快D瞓啦！

莫說三歲的孩子不懂事不明白，你肯説他就會像海綿般吸收，適當時就會想起又發問下去。雖然這些問題像是不斷無限loop，但這就是小孩子make sense of his story的方法。對他可以在我面前表露情感給予肯定及支持也是極其重要的！